ЕК даде рок за старт на преговори: Скопје порачува дека решение ќе има само со заштитени национални интереси

– Откако Европската комисија во средата првпат даде рок за одржување на првата меѓувладина конференција со Северна Македонија и Албанија и преговорите со двете држави да почнат пред крајот на француското претседателство, на 30 јуни, еврокомесарот за проширување Оливер Вархеји пред да замине од Софија порача дека за три недели повторно ќе се врати таму, за да се најде заеднички прифатливо решение за отворање на преговорите со Северна Македонија. Власта, пак, смета дека иако земјава сака да ги почне преговорите со ЕУ, тоа да не биде по секоја цена и на штета на државните интереси при решавањето на спорот со Бугарија.

Вицепремиерот за евроинтеграции Бојан Маричиќ синоќа истакна дека месецот јуни, како пресуден за добивање датум, е спомнат од ЕУ поради геополитичката ситуација со војната во Украина и дека Владата сака да ги почне преговорите со ЕУ, но не по секоја цена и на штета на државните интереси при решавањето на прашањето со Софија.

– ЕУ е таа, која притисната од геостратешката ситуација, почна прва да го комуницира јуни како датум и комесарот Вархеји и официјалните портпароли на ЕУ. Тоа значи дека има некое чувство на ургентност во ЕУ. Меѓутоа, ние немаме намера да направиме чекор кој ќе ги наруши нашите интереси, рече Маричиќ.

Како што потенцираше вицепремиерот, сакаме да почнеме преговори со фер договор, кој нема да задира во нашето достоинство и идентитет.

– Нашиот пат е јасен и секогаш бил јасен. Никогаш не сме отстапувале и никогаш не бил лесен, секогаш сме имале тешкотии и Северна Македонија е една од државите коишто имала најтежок пат до исполнување на своите стратешки интереси, кажа Маричиќ.