Подгответе се: Од идниот месец оваа опрема е задолжителна во вашиот автомобил

Иако температурите се уште не се доволно ниски, време е да почне да се размислува за зимски гуми на автомобилот, а оние кои треба да ги набават, да почнат да планираат пари за тоа.  Во спротивно, можете да возите и со летни гуми цела зима, но освен тоа што ќе имате проблеми со управливоста на возилото, ќе мора да носите и синџири во ѓепек.
Оние кои работат со автомобилски гуми, велат дека тие најдобро е да се сменат тогаш кога температурата надвор нема да се качува над 7 степени.
Ако возите летни гуми на температури пониски од 7 степени, тие забрзано се трошат. Обратно, зимските гуми страдаат кога ги возите на температури кои се над овие 7 целзиусови степени.

Како и да е, законите во Македонија пропишуваат, задолжителната зимска опрема да ја имате во вашето возило почнувајќи од 15 ноември.

Имено, во правилникот по однос на потребната зимска опрема прецизирано е следното:

1.Како зимска опрема на моторни возила со најголема дозволена маса која не надминува 3.500 кг. се подразбира:

-  зимски пневматици на сите тркала, со минимална длабочина на шарите на слојот што гази по обем и широчина, од 4 mm.

- пневматици со летен профил на сите тркала со длабочина на шарите на слојот што гази по обем и широчина, со минимум од најмалку 4 mm. ако возилото во приборот има синџири за снег со адекватна големина за погонските тркала или други соодветни помагала.

2.Како зимска опрема за моторни возила со погон на четири тркала (4 x 4 ) се подразбира:

- зимски пневматици на сите тркала, со минимална длабочина на шарите на слојот што гази по обем и широчина, од 6 mm.

- пневматици со летен профил на сите тркала, со длабочината на шарите на слојот што гази по обем и широчина, со минимум од најмалку 4 mm. Ако во возилото во приборот има синџири за снег и во случај кога имаат постојан погон, синџири за снег треба да имаат најмалку за задната осовина, а во случај на преклоплив

погон, синџири за снег треба да имаат најмалку на постојано вклучената осовина.

3. Како зимска опрема на моторни возила со најголема дозволена маса која надминува 3.500 кг. се подразбира:

- зимски пневматици на погонските тркала со минимална длабочина на шарите што газат по обем и широчина, од 6 mm.

- пневматици со летен профил на сите тркала со длабочина на шарите на слојот што гази, по обем и широчина, со минимум од 4 mm. ако возилото во приборот има синџири за снег со адекватна големина за погонските тркала или други соодветни помагала.

- автобуси и товарни моторни возила кои поради технички причини не можат да постават синџири за снег на погонските тркала треба да имаат зимски пневматици на погонските тркала, и

- прирачен алат – лопата.

4. Зимски пневматици се оние пневматици кои на својата бочна страна имаат ознака: „МЅ“, „М+Ѕ“, „М&Ѕ“ и знак на снегулка на стилизирана планина со три врва.

5. Во согласност со овој правилник, во патниот сообраќај на возилата не се поставуваат пневматици со клинци.

МВР, во интерес на навременото информирање на учесниците во сообраќајот, потенцира дека согласно пропишаните норми  униформираните полициски службеници ќе наредат на возач да го прекине натамошното движење на возилото, ако не постапи според сообраќајниот знак за задолжително носење и употреба на зимска опрема.

Исто така, согласно законските одредби униформираните полициски службеници може да наредат возачот да го прекине натамошното движење и кога не постои сообраќаен знак за задолжително носење на зимска опрема, ако зимските услови на патот не овозможуваат непречено и безбедно одвивање на сообраќајот, односно задолжително да ја постави на возилото зимската опрема. Притоа, граѓаните треба да имаат предвид дека глоба во износ од 15 евра во денарска противвредност, во мандатна постапка, ќе му се изрече на возачот кој постапува спротивно на одредбата од членот 404 став 1 од Законот за безбедност на сообраќајот на патиштата.