Одрон затрупа автобус во Колумбија - десетина загинати
Најмалку 27 лица загинаа во лизгање на земјиштето што затрупа автобус во северозападна Колумбија во провинцијата Рисаралда, соопштија денеска колумбиските власти.
„Досега 27 лица, меѓу кои и три малолетни, загинаа во трагедијата во Рисаралда“, напиша на Твитер колумбискиот претседател Густаво Петро.
Тој додаде дека изразува солидарност со семејствата на жртвите и вети поддршка од Владата.
Претходно, гувернерот на Рисаралда, Виктор Мануел Тамајо изјави дека пет патници од автобусот преживеале, а спасувачите работат на пронаоѓање на телата на другите жртви, пренесува Ројтерс.
Колумбија ја погодија обилни дождови под влијание на временскиот феномен Ла Ниња, а досега загинаа повеќе од 216 лица, 48 лица се уште се водат како исчезнати, додека 538.000 луѓе останаа без своите домови поради несреќи предизвикани од врнежите.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа