Пахор: Јас сум против промена на границите, го поддржувам проширувањето на ЕУ кон Западен Балкан

Претседателот на Словенија, Борут Пахор, денес ја отфрли идејата за промена на границите на државите од поранешна СФРЈ и рече дека го поддржува проширувањето на ЕУ кон Западен Балкан и проширувањето на ЕУ.

Пахор на прес-конференцијата рече дека нема информации за нон-пејперот и дека за тоа не разговарал со премиерот Јанез Јанша.

„Ја бранам тезата дека би било најдобро ЕУ да одлучи да ги вклучи сите земји од Западен Балкан во ЕУ“, рече Пахор.

Пахор рече дека проширувањето на ЕУ станува прашање на време, а не само политичка волја.

„Бавното темпо на проширување ја топи довербата во европската перспектива во овие земји, а последиците може да бидат зајакнување на национализмот и зголемување на влијанието на третите земји“, рече Пахор, како што објави словенечкиот портал 24ur.

Тој посочи дека проширувањето ќе спречи појава на опасни идеи за промена на границите, на што остро се спротивставува.

„Како претседател на Републиката, јас ја посетив БиХ седум пати. За време на последната посета, ниту порано, ниту подоцна, не бев запознаен со ниту еден неофицијален документ. Јас силно се спротивставувам на идејата за конечно распаѓање на Југославија и промена на границите “, рече словенечкиот претседател.

Според него, не е можен мирен процес на промена на границите на Западен Балкан.

„Побрз процес на интеграција на земјите од Западен Балкан во евро-атлантските организации ќе го зајакне принципот на територијален интегритет на земјите и безбедноста и стабилноста на цела Европа“, изјави Пахор.

Макфакс

 

 

 

Добивајте вести на Viber

16.04.2021 - 14:58

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега