Заев: Просечната плата продолжува да расте – од јануари минималната ќе биде 300 евра

Премиерот Зоран Заев вели дека продолжува трендот на раст на просечната плата. Тој преку социјалните мрежи истакна дека за една година платата е зголемена за нешто повеќе од 1.100 денари.

-Просечната плата продолжува да расте, во август годинава таа изнесувала 28.642 денари. Согласно податоците на Државниот завод за статистика, тоа значи зголемување од 4% во однос на истиот месец лани, поточно за 1.107 денари.  Зголемувањето се должи, пред сѐ, на покачувањето на просечната месечна исплатена нето-плата по вработен во секторите: Стручни, научни и технички дејности (14,0%), Објекти за сместување и сервисни дејности со храна (13,4%) и Други услужни дејности (12,6%). Доколку последниот податок го споредиме со август 2017 година кога просечната плата била 22.912 денари, разликата е 5.730 денари. Податоците го потврдуваат трендот на раст на платите кој е економски резултат на мерките и политиките што ги спроведува Владата за раст на просечната и на минималната плата, напиша Заев на Фејсбук.

Најави и дека минималната плата од први јануари ќе се зголеми на 300 евра.

-Посветени сме на реализација на стапките на економски раст од 4-5% и покачување на платите сѐ со цел подобрување на стандардот на граѓаните и економијата во земјата. Минималната, просечната плата и пензиите ќе продолжат забрзано да растат. Од 1 јануари 2022 година, просечната плата ќе биде 500 евра, а минималната плата 300 евра. Грижата за сите граѓани продолжува, напиша Заев.