Американските берзи паднаа за 2,2 проценти на отворањето во Њујорк

Американските берзи паднаа во четвртокот наутро, по американско време, враќајќи дел од големите добивки од претходната сесија, бидејќи трговците и натаму се фокусираат на царините на Доналд Трамп и нивното можно влијание врз глобалниот раст иако синоќа беа одложени, пишува Фајненшл тајмс.

Индексот S&P 500, кој во средата скокна за 9,5% во својата најдобра сесија од 2008 година, падна за 2,2% веднаш по отворањето во Њујорк. Технолошкиот Nasdaq Composite, кој во средата порасна за повеќе од 12% — најдобар ден од 2001 — падна за 2,8%.

Овие движења следат по извештајот дека инфлацијата во САД во март паднала повеќе од очекуваното, на 2,4%.

Во Европа, берзите се повлекоа од утринските добивки. Индексот Stoxx Europe 600 беше во пораст од 5,2% попладнево, откако во еден момент скокна за 7,3%. Францускиот CAC 40 порасна за 5,5%, откако претходно достигна 7,6%. Германскиот DAX се искачи за 5,7%, по иницијалниот скок од 8,3%. FTSE 100 во Велика Британија беше повисок за 4,5%, откако претходно порасна за 6,3%.

Приносите на 10-годишните американски државни обврзници останаа на 4,3%. Во Германија, приносите на обврзниците со иста доспеаност се зголемија за 0,03 процентни поени на 2,61%, додека британските „gilts“ паднаа за 0,08 процентни поени на 4,7%. Приносите се движат спротивно од цените.

Глобалните берзански индекси претходно постојано паѓаа поради најавата на Трамп за воведување „реципрочни“ царини за десетици трговски партнери на САД.

Иако во средата се повлече од поголем дел од тие мерки поради тензиите на пазарот на обврзници, Трамп сепак ги зголеми царините кон Кина — од 104% на 125%.

Во четвртокот, кинескиот јуан падна на најниско ниво од 2007 година.

Фјучерсите на американските акции го намалија падот, приносите на обврзници исто така паднаа
По објавата за пониска инфлација, инвеститорите ги намалија очекувањата за краткорочно намалување на каматите од страна на Федералните резерви.

Приносот на 2-годишните обврзници — кој е чувствителен на очекувањата за каматни стапки — падна на 3,8%, за 0,11 процентни поени. Фјучерсите за индексот S&P беа пониски за 1,9%, додека Nasdaq 100 фјучерсите паднаа за 2,3%.

И покрај корекцијата, пазарите сè уште предвидуваат меѓу три и четири намалувања на каматните стапки до декември.