Aвион се урна на тркачка патека во Британија, има загинати

Двајца мажи загинаа откако авион се урна на познатата тркачка патека.

Службите за итни случаи биле повикани на пистата во близина на Ешборн, Дербишир, по извештаите за авионска несреќа. Екипите веднаш се упатиле на местото на несреќата на тркачката патека Дарли Мур откако го добиле повикот околу 11:30 часот, јавува Мирор.

Полицијата во Дербишир оттогаш потврди дека двајца мажи загинале во инцидентот. Тие додадоа дека итните служби се уште се на местото на настанот и ја повикаа јавноста да ја избегнува областа. Полицијата потврди и дека се известени семејствата на убиените.

Еден сведок изјави дека на патеката бил забележан хеликоптер на брза помош и неколку противпожарни возила. Во официјалното соопштение, полицијата потврди дека двајца мажи загинале „откако лесен авион се урна на тркачката патека Дарли Мур“.

„Семејствата на двајцата мажи се информирани и нашите мисли се со нив во овој тежок момент. Се подготвува извештај за судскиот вештак“, соопшти полицијата.

Противпожарната и спасувачката служба Дербишир соопшти дека екипите од Ешборн, Вирксворт, Нотингем Роуд, Стејвли и Атогсетер во Стафордшир биле повикани на местото на несреќата, пренесува DerbyshireLive. Портпаролот на противпожарната служба рече: „Противпожарната и спасувачката служба на Дербишир доби извештај за инцидент во кој учествуваше лесен авион на тркачката патека Дарли Мур во 11.25 часот“.

„Пожарникарите се испратени на местото на настанот. Оттогаш, пожарникарската сила е намалена, но екипите од Ешборн и Вирксворт остануваат на местото за да ги поддржат своите колеги од полицијата“.

Друг сведок изјави дека возило на службата за итни случаи било видено како патува по патот Ешборн во Дерби, кон Ешборн, околу 11.30 часот утринава.

Полицијата во Дербишир потврди дека огранокот за истрага на воздушни несреќи (ААИБ) започна истрага за инцидентот.

Портпаролот на ААИБ рече: „Известени сме за несреќа на лесен авион во областа Ешборн во Дербишир. Покрената е истрага и мултидисциплинарен тим од инспектори се на пат кон местото на настанот“.

Воведени се и ограничувања на воздушниот простор, според ААИБ. Во наредбата, потпишана од министерот за транспорт, се наведува дека ниту еден авион не смее да лета под 488 метри над средното ниво на морето над областа Дарли Мур.

Тркачката патека Дарли Мур е дом на клубот за друмски трки со мотоцикли.

Настаните на патеката се одржуваат од март до октомври секоја година, додека аматерски денови на јавање се организираат од април до октомври, наменети за оние кои размислуваат да се приклучат на спортот. Клубот постои од 1964 година, на местото на поранешната база на РАФ од Втората светска војна. Дарли Мур е единствената тркачка патека во Обединетото Кралство во сопственост на клуб и со текот на годините беше домаќин на многу познати имиња од светот на мотоциклизмот.