Бајден за пресудата против Трамп: Никој не е над законот

Американскиот претседател Џо Бајден изјави дека пресудата на Доналд Трамп во судскиот процес за поткуп на ѕвездата од филмовите за возрасни го потврди „американскиот принцип дека никој не е над законот“.

Говорејќи од Белата куќа, Бајден рече дека поротата е составена од Американци, кои ги слушнале доказите и донеле едногласна пресуда.

„Доналд Трамп ги доби сите можности да се брани. Државен случај, а не федерален. Го разгледуваше порота од 12 граѓани. Дванаесет Американци. Дванаесет луѓе како вас, како милиони Американци кои беа во поротата“, рече Бајден.

Додаде дека поротата за Трамп е „избрана на ист начин како што е секоја порота во Америка“ и дека тоа е „процес во кој учествувал адвокатот на Доналд Трамп“.

„Поротата сослуша петнеделни докази. По пет недели внимателно размислување, поротата донесе едногласна пресуда. Тие го прогласија Доналд Трамп за виновен по сите 34 точки од обвинението“, додаде тој.

Бајден рече дека Трамп сега ќе има можност да се жали на одлуката бидејќи „така функционира американскиот правосуден систем“.

„Непромислено е, опасно е, неодговорно е некој да каже дека ова е наместено само затоа што не му се допаѓа пресудата. Нашиот правосуден систем постои речиси 250 години и е буквално камен-темелник на Америка. Никогаш не треба да дозволиме некој да го урне така лесно. Ова е Америка, ова сме ние. Секогаш ќе биде, ако даде Господ“, продолжи Бајден.

Трамп беше прогласен за виновен по 34 точки од обвинението за фалсификување деловни документи за да се прикријат исплатите на порно ѕвездата Сторми Даниелс пред изборите во 2016 година.