Белорусија започна вежба за употреба на нуклеарно оружје

Белорусија денеска започна вежба на ракетни единици и сили на воздухопловните сили за употреба на тактичко нуклеарно оружје.

Тоа оружје беше распоредено во Белорусија од нејзиниот близок сојузник Русија како дел од заострувањето на нејзиниот став кон Западот поради војната на Русија против Украина.

Руското тактичко нуклеарно оружје во Белорусија е под контрола на руската војска.

Белорускиот министер за одбрана Виктор Кренин изјави дека во вежбата учествува ракетната единица со краток дострел Искандер и ескадрила борбени авиони Су-25.

Вежбата започна на денот на инаугурацијата на рускиот претседател Владимир Путин за неговиот петти мандат. Во својот говор тој вети дека ќе ја обезбеди безбедноста на Русија.

Распоредувањето на руското тактичко нуклеарно оружје во Белорусија овозможува лесен и брз руски напад врз Украина и го проширува досегот на Русија до неколку земји од НАТО.

Во понеделникот Русија најави одржување на слична вежба на нејзина територија, симулирајќи употреба на нуклеарно оружје. Таа вежба, како што е кажано во Москва, е одговор на изјавите на западните претставници кои укажуваат на можно поголемо учество на Западот во војната во Украина.

Москва никогаш досега не најавила вакви вежби.

За разлика од интерконтиненталните балистички ракети со нуклеарни боеви глави кои можат да уништат цели градови, тактичкото нуклеарно оружје е наменето за употреба против трупите на бојното поле и е помалку моќно. Ова оружје вклучува бомби, ракетни глави со краток дострел и артилериска муниција.