ЕП нема да ги набљудува претседателските избори во Азербејџан

Европскиот парламент нема да ги набљудува претседателските избори во Азербејџан, закажани за 7 февруари, ниту ќе се произнесе за резултатите, се наведува во заедничката изјава на Комитетите на ЕП за надворешни работи и развој.

-Ниту еден европратеник не е овластен да ги набљудува или коментира изборите во име на ЕП, и ако некој од европратениците одлучи да ги оцени, ќе зборува и ќе дејствува во свое име, се додава во изјавата.

ЕП во октомври минатата година изгласа резолуција со која се осудува Азербејџан за насилното заземање на Нагорно Карабах и повика на санкции и преразгледување на односите со Баку. Според ЕП акцијата на Азербејџан во Нагорно Карабах е етничко чистење што довело до раселување на повеќе од 100.000 етнички Ерменци. ЕП наведе дека ги прекинува сите преговори за обновено партнерство со Баку и размислуваат за прекинување на договорот за олеснет визен режим со Азербејџан.

ЕП ја повикува ЕУ да ја намали зависноста од увозот на гас од Азербејџан.