(ФОТО) Груби се „ребрендираше“ за автопатот Прилеп - Битола

Артан Груби, првиот вицепремиер денеска се „ребрендираше“ со нова маица со натпис „10Д“ на поставувањето на камен темелник на проектот Коридор 10-д, делница што од Прилеп до Битола ќе ја гради „Бехтел и Енка“.

Груби имаше поздрав на три јазици, па рече дека е среќен што денот ќе го сподели со присутните. На премиерот Димитар Ковачевски му се заблагодари на поддршката за проектот за коридорите 8 и 10 д. Преку собранискиот претседател Талат Џафери им се заблагодари и на пратениците. Од пултот неколку минути имаше и низа други поздрави.

„Овој проект продолжува и сите влади, а следната секако ќе биде истата како оваа денеска, ќе го завршат овој проект, ќе ги пресечат лентите. Втората порака денеска ми е тоа што го гледате денеска во Собранието и тоа што Владата го направи е порака дека е дојден крајот на заложништвото на Собранието, проектите и иднината на граѓаните. Ова мнозинство демонстрира што значи да се стави крај на блокадата. Од денес при изградба на вакви проекти упатувам порака дека е дојдено време да ставиме крај и на блокадата на нашето европско интегрирање“, рече Груби.

Груби рече дека тој е качен на возот, па ги покани и другите. Им рече: „Овој воз вози кон Брисел и никој не може да го сопре“.

На претходната церемонија Груби се појави со маичка „8“, што подоцна му ја подари на новинар.