Ивановска: Факт е дека постои корупција – не можам да бидам задоволна како државата се справува

Корупција во државата има, но мора да се докаже. Претседателката на Антикорупциската комисија, Билјана Ивановска вели дека токму корупцијата е сигнал за лошо управување со државните ресурси.

– Факт е дека постои корупција. Факт е дека постои трговија со влијание коешто најтешко се докажува. Дали имаме? Очигледно, штом постои корупција, очигледно е дека имаме. Работата е како тоа да го докажеме и како тие сомневања Јавното обвинителство да ги земе во предвид. Кога постои корупција, тоа значи дека постои сигнал за лошо управување со државни ресурси. Кој управува со државните ресурси? Тоа се државните функционери. Јас ви кажувам дефиниција – штом постои корупција, постои лошо управување со државните ресурси, вели Ивановска во интервју на Канал 5.

Претседателката на Антикорупциската комисија е незадоволна од тоа како државата се справува со корупцијата.

– Како државата се справува со корупцијата, не можам да бидам задоволна, затоа и ваков е и степенот, нивото на корупцијата во државата. Не гледам дека секој од сѐ срце се залага за нешто потивино да се случи во државата, туку секој како да си мете пред својот двор и јас за ова не сум надлежен и тука се завршува приказната, вели таа.