ОН ја прекинуваат ноќната испорака на храна во Газа

Обединетите нации ги прекинаа ноќните движења во Газа на најмалку 48 часа за да ја проценат безбедносната ситуација по убиството на персоналот кој работеше во хуманитарната организација за храна Светската централна кујна, изјави портпаролот на ОН Стефан Дужарик.

Тој рече дека паузата започнува денес. Светската програма за храна продолжува да работи во текот на денот, вклучувајќи ги и секојдневните напори за испраќање конвои во северниот дел на Газа каде што луѓето умираат, рече Дужарик.

„Како што се приближува гладта, ни треба хуманитарен персонал и материјали за да можеме слободно и безбедно да се движиме низ Појасот Газа“, изјави тој за новинарите, пренесе Ројтерс.

Израелскиот премиер Бенјамин Нетанјаху рече дека Израел по грешка убил седум лица кои работеле за Светската централна кујна во понеделникот во воздушен напад во Газа, што предизвика осуда и повици од Соединетите Држави и другите сојузници да објаснат како се случило тоа.

ОН долго време се жалат на пречките за добивање помош и нејзина дистрибуција низ Газа.

ОН постојано повикуваа на итен шестмесечен хуманитарен прекин на огнот меѓу Израел и Хамас.