Нетанјаху потврди: Елиминиран Мохамед Синвар, новиот лидер на Хамас во Газа

Израелскиот премиер Бенјамин Нетанјаху денеска изјави дека лидерот на Хамас во Газа, Мохамад Синвар, еден од најбараните Палестинци и помладиот брат на починатиот водач на таа група, Јахја Синвар, е елиминиран, пренесува Ројтерс.

Пред десетина дена беше објавено дека во тунел во Кан Јунис се пронајдени телата на лидерот на Хамас во Газа, Мохамед Синвар и десет негови соработници. Тогаш за тоа објави саудискиот ТВ канал Ал-Хадат.

Ал Хадат, исто така, објави дека командантот на бригадата Рафа, Мохамед Шабана, бил убиен во израелските напади заедно со Синвар.

Мохамед Синвар беше палестински политичар и воен командант кој беше лидер на Хамас во Појасот Газа од октомври 2024 година, откако неговиот брат Јахја Синвар беше убиен во војната меѓу Израел и Хамас.

Синвар беше вклучен во киднапирањето на израелскиот војник Гилад Шалит во 2006 година и преживеа неколку обиди за атентат на Израел. Израелските служби го сметаа за еден од клучните организатори на нападот врз Израел на 7 октомври 2023 година и еден од најбараните лица во Газа, со награда од 300 илјади долари (269 илјади евра) за информација каде се наоѓа.