Турски бизнисмени заинтересирани за инвестирање во Македонија

Турски бизнисмени се заинтересирани за инвестирање во туризмот, енергетиката, металската и хемиската индустрија во Македонија.

Тие вчера по бизнис форумот во Измир имаа одделни средби со владината делегација предводена од премиерот Никола Груевски на кои подетално се запознаа со поволностите што им се нудат на странските инвеститори во Македонија.

Подготвеност за инвестирање пред владината делегација изрази и група македонски иселеници од индустриската област Коџаели и Истанбул. На разговорите за повеќе општествени и политички теми истакнале дека ја одржуваат врската со Македонија.

По завршувањето на бизнис форумот во Коџаели, владината делегација продолжува со претставување на условите за водење бизнис пред турски бизнисмени во градот Ескишехир, кој има развиена прехранбена, градежна и машинска индустрија.

Ескишехир е еден од петте големи индустриски центри на Турција. Наредните денови ќе се одржат бизнис форуми во турските градови Анкара, Адана и Мерсин.

Во среда се очекува да биде остварена средба со турскиот претседател Реџеп Таип Ердоган и со турскиот премиер Ахмет Давитоглу. Во составот на владината делегација се и министрите без ресор за привлекување странски инвестиции Бил Павлески и Фуркан Чако, како и заменик директорот на Агенцијата за странски инвестиции и поттикнување на извозот Климент Шекеровски.

Турција е меѓу 10-те најзначајни трговски партнери на Македонија. Во 2013 година, Турција е на 9-то место, а странските директни инвестиции во последните две години изнесуваат 44 милиони евра