Стотици имигранти заробени на брод во дефект во близина Крит

На товарен брод со стотици имигранти, кои тргнале кон Европа, му откажал моторот во близина на бреговите на Крит, соопштија грчките власти.

Товарниот брод долг 77 метри, е носен од силен ветер, околу 30 наутички милји југоисточно од Крит, се наведува во сопштението на грчката крајбрежна стража.

Се проценува дека на товарниот брод се наоѓаат меѓу 500 и 700 луѓе, но нивната националност, местото од кое тргнале, како и дестинацијата, засега не се познати.

Во спасувачката операција учествуваат четири трговски брода и една фрегата на грчката морнарица, кои се подготвени, доколку биде потребно, да го евакуираат бродот, а се разгледува опција и за негово одвлекување.

Грција е главна точка на влез за бегалците кои настојуваат да стигнат во Европа, посебно оние од државите разорени од војни како Сирија и Либија.