Во април стартуваат вработувања со новите поволности за компаниите

До крајот на април ќе се реализираат вработувањата по основ на сетот нови мерки кои ги најави премиерот Груевски за намалување на невработеноста. Во наредните неколку дена, а најверојатно на следната владина седница, ќе се усвојат законски решенија за новите мерки, кои имаат за цел вработување на една широка категорија на граѓани и намалување на невработеноста, информира владиниот портпарол, пишува Лидер.

-Работни групи од економските министерства интензивно работат на преточување на овие мерки во закон, се очекува во наредните десет дена, Владата да го усвои законот, кој подоцна ќе оди на гласање во Собрание. Се очекува на до крајот на април и почетокот на мај, да почнат првите вработувања по основа на овие мерки, изјави Александар Ѓорѓиев, портпарол на Владата.

Работодавачите кои ќе вработат млади лица до 35 години ќе бидат ослободени од плаќање на персонален данок и придонеси во рок од три години. За работодавачите,пак кои ќе вработат лица на возраст од 35 до 50 години, а кои биле 10 години без работа, ќе бидат ослободени од персонален данок и придонеси пет години со обврска уште една година да го задржат работникот, се дел од мерките за кои информираше премиерот Груевски.

-Оние, пак, кои ќе вработат лица над 50 години ќе бидат ослободени од персонален данок и социјални придонеси пет години без обврска после тоа да ги задржат вработените. Оваа мерка ќе се однесува и за оние кои ќе вработат лица над 58 години. Тие фирми ќе бидат ослободени од персонален данок и придонеси, односно до пензионирањето на тој работник. Оние работодавачи, пак, кои ќе вработат лица од ранливите категории како што се самохраните родители, лицата од еднородителските семејства, оние со три или повеќе деца, ќе бидат ослободени од плаќање на персонален данок и придонеси во рок од пет години без обврска да ги задржат вработените, изјави Никола Груевски, премиер на Р.М

Последната група која ќе биде опфатена со овие мерки се ранливата категорија на граѓани – самохрани родители и еднородителски семејства, семејства со три или повеќе деца, приматели на социјална помош, професионални војници кои веќе не работат, деца без родители и родителска грижа, лица со инвалидитет и родители на деца со посебни потреби. За оваа категорија на граѓани, појасни Груевски, се предвидува ослободување од плаќање придонеси во период од 5 години, без никаква обврска за работодавачот потоа.

Позитивни реакции за новите мерки

По објавувањето на новите мерки, позитивни реакции стигнаа од бизнисмените, работодавачите и компаниите. Тие, мерките ги оценија како корисни и позитивни кои од една страна ќе придонесат за драстично намалување на невработеноста, а од друга страна ќе значат олеснување на давачките за компаниите.

-Овие мерки ја потврдуваат стратегијата на владата да продолжат отпочнатите проекти кои што ги има во делот на вработувања. Со овие мерки се создава еден континуитет и се овозможува, се дава една исклучителна можност на компаниите тие да бидат мотивирани, да се зголемат капацитетите на човечките ресурси во нивните компании и така е се даде можност на голем број луѓе кои не се кфалификувани да работат во една компанија, да добијат простор да бидат квалификувани, а со тоа државата ќе даде голем придонес во делот на ослободување на персонален данок и останатите давачки за придонеси. Сметаме дека ова е искучителна можност за компаниите да ги прошират своите човечки капацитети, апсурдот кој што го имаме во државата покрај голема невработеност да немаме доволно стручни кадри, оваа можност да се искористи во таа насока- да се квалификуваат луѓе кои што ќе можат да допринесат во компаниите. Веќе атмосферата кај голем дел од компаниите и менаџерите се коментираат позитивно овие мерки, се препознава стратегијата на Владата дека има намера сериозно да се зафати со проблемот – невработеност и да се изнајдат сите можни начини да се мотовираат и компаниите и невработените да се активираат и да најдат работа, изјави за Лидер, Сеад Кочан, потпретседател на ССК.

“Она што се најавуваше подолго време дека ќе имаме ослободување за вработување на лица и се случи и мислиме дека во овој момент секој трошок намален за водење бизнис, а во насока на вработувањето и вклучување на што повеќе лица во работниот процес е квалитетна одлука и мерка и треба да се продолжи да се реализира, со што ќе биде начин за потикнување на водење бизнис во Македонија“ изјави Миле Бошков, од Конфедерацијата на работодавачи.

Само со мерката за вработување на млади до 29 години за една година се вработени 7.400 лица за 11 месеци. Инаку согласно Оперативниот план на Агенцијата за вработување, годинава со мерките ќе бидат опфатени 16 000, а се очекува 8000 да се вработат.