Се градат забавен парк, летниковец и мини пазар во Кавадарци

Се градат забавен парк, летниковец и мини пазар во новиот центар во Кавадарци, позади зградите познати како „Лепотици”. Од кавадаречката локална самоуправа денеска изразија задоволство што локацијата која во минатото беше претворана во депонија, сега добива сосема поинаков лик.

– Партерно се уредува овој простор кој најпрвин беше планиран за деловно трговски центар. Но, по реакциите на околните жители, се донесе одлука локацијата да биде искористена за одмор и рекреација граѓаните, како и за мини пазар во кој ќе пазаруваат кавадарчани кои живеат во овој нов дел на Кавадарци, информираа од општината.

Оттаму појаснија дека летниковецот е изграден со помош на средства од Вардарскиот плански регион. Партеното уредување ќе чини 1,5 милион денари. Уште толку се планира да се инвестираат во хортикултура. Во тек е тендерот за осветлување на овој простор и за изградба на мини пазар. За три до четири месеци овде ќе биде изграден мини пазарот за кој трезгите се веќе набавени.

Се работи и на други локации во општината, од локалната самоуправа најавија дека секој погоден момент ќе се користи за комунална изградба.