Груевски му ја честита победата на Трамп: Подготвени сме да ја унапредиме соработката во сите области од заеднички интерес

 

Лидерот на ВМРО-ДПМНЕ, Никола Груевски испрати честитка до новоизбраниот претседател на САД, Доналд Трамп.

Во продолжение следува неговата честитка

Вам и на народот на САД ви ја честитам победата на претседателските избори. Принципот на почитување на волјата на народот е врв на демократијата, тоа e победа на правото на слободната волја на сите граѓани.

Вашето претседателствување повлекува огромна чест и одговорност да се биде предводник во битката за градење на подобар свет, за возобновување и подобрување на општеството. Во таа насока ви посакувам многу среќа и успех.

Во овој свечен момент сакам да го истакнам задоволството од развојот на односите и соработката меѓу Република Македонија и САД и воедно да ја искажам нашата подготвеност за нивно натамошно унапредување и интензивирање во сите области од заеднички интерес.

Членството во НАТО претставува наш приоритет и темелна заложба при што особено ни е значајна поддршката од САД како наш стратешки пријател.

Уверен сум дека пријателството и разбирањето во односите меѓу нашите две земји ќе продолжи да се негува и дополнително развива.

 
 
09.11.2016 - 17:04

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега