Домашните месни капацитети ги задоволуваат потребите за свежо месо

Месните капацитети во државата ги задоволуваат потребите на домашниот пазар за свежо месо, а недостиг има за преработките што се надополнува со увоз од околу 90 проценти говедско и 50 проценти свинско месо, изјавија денеска на прес-конференција од Стопанската комора на Македонија.

- Сточарското производство, кое е базата на месната индустрија, за жал, не бележи позитивни резултати во изминатата деценија. Според статистичките податоци, бројот на говедата е на исто ниво, односно околу 250 илјади во изминатите 10-тина години со благи отстапувања, а има драстично намалување во овчарството каде во 2000 година имаше еден милион и триста, а сега едвај 600 илјади овци. Намалување има и кај свињарството од 250 милијади во 2000 година, до 176 илјади свињи сега. Намалување има и кај живинарството, истакна Васко Ристовски на денешната прес-конференција.

Во делот на производството на месо, во 2012 година се произведени 23.124 тони месо што е намалување во споредба со 2009 година.

- Според нашите анализи, целосно е задоволена понудата на свежо месо за потрошувачката на населението, меѓутоа за потребите на месната индустрија имаме недостиг. Тој недостиг се увезува согласно дадените дозволи од Агенцијата за ветеринарство, рече Стојмирка Тасева.

Во Македонија работат над 30 капацитети за преработка кои ги исполнуваат високи стандарди.