ВМРО-ДПМНЕ: Насилното туркање на Законот за ЈО е уште една потврда дека во Македонија владее хибриден режим
Амнестија за Зоран Заев, Катица Јанева и Боки 13 е главната цел на инсистирањето на СДСМ да се донесе новиот закон за јавно обвинителство, соопштуваат од ВМРО-ДПМНЕ.
Од партијата истакнуваат дека Заев сака да не важат како докази снимките за рекетот и криминалите во кои се инволвирани тој и неговите соработници.
-Без да ја почитува волјата на граѓаните, со измами, криминал и корупција Зоран Заев го започна својот мандат. На ист начин, шверцерски и криминално, три години подоцна го завршува мандатот баш како што го започна и практикуваше. Насилното туркање на Законот за обвинителство е уште една потврда дека во Република Македонија владее хибриден режим. Криминалната банда на чело со аболицираниот Заев сака на шверцерски начин да го изгласа Законот за Јавно обвинителство, а крајната цел на ваквото законско решение е да се спасат од одговорност за сите криминални афери изминативе 3 години, се наведува во соопштението.
Од партијата додаваат дека амнестијата на криминално рекетарската банда за СДСМ е поважна од забелешките на правните експерти кои жестоко го критикуваа законското решение на Заев.
-Она што го нуди Заев со Законот за јавно обвинителство е доживотен мандат за Вилма Русковска и Љубомир Јовевски кои ќе можат да се сменат само со 2/3 мнозинство во Советот на јавни обвинители. На овој начин Заев се осигурува дека делата против него никогаш нема да бидат преточени во обвиненија, а Русковска и Јовевски ќе продолжат со селективната правда и ќе ги извршуваат неговите наредби. Ова е причината поради која СДСМ е подготвено по секоја цена дури и на шверцерски начин, кршејќи го собранискиот Деловник, Уставот и законите да го протурка новиот Закон за обвинителство. Ниту еден закон нема да ја спаси власта од одговорност. Ќе одговараат сите оние кои се огрешиле пред законот како и оние кои што изминатите три години наместо да го гонат го штитеа криминалот и корупцијата. По 12 април ќе се врати правдата во и за Македонија, а владеењето на Зоран Заев нема да се повтори никогаш повеќе, стои во соопштението.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа