Ласовска: На пратеничките листи на ВМРО-ДПМНЕ во голем процент ќе бидат достоинствени, чесни и силни жени

Во вечерашната емисија “Тренд анализа” гостуваше претседателката на Унијата на жени на ВМРО-ДПМНЕ, Благица Ласовска.

Во однос на пратеничките листи кои во наредниот период треба да ги објави ВМРО-ДПМНЕ, Ласовска образложи дека на тие листи во голем процент ќе бидат застапени жени.

Законскиот минимум за застапеност на жените на пратеничките листи е 40%, но Ласовска вели дека тој процент може да биде и поголем поради тоа што жените во ВМРО-ДПМНЕ претставуваат чесност и сила која ја движи партијата од нејзиното формирање.

Ласовска исто така додаде дека ВМРО-ДПМНЕ отсекогаш давало поддршка на жените во партијата и стоело зад сите проекти од страна на Унијата на жени.

-Јас сметам дека жените не треба да бидат некакви квоти. Жените некогаш понесуваат товар и одговорност кои ретко кој маж ги понесува. Како политички, така и во приватниот живот. Но, за жал, односно реалноста е дека квотите се уште постојат и рангирањата и кандидатурите мораат да бидат во рамка на истите, кои барем досега се почитувани од страна на мажите во ВМРО-ДПМНЕ, односно и самата партија, вели Ласовска.

Жените во изминатите петнаесетина години се директно инволвирани во политичките процеси, како и раководењето со важни институции во државата.

-Тоа покажува дека жените се рамноправни во функционирањето на политички план и дека општеството е подготвено да се потпре на жена која би раководела со одредена институција или пак би била дел од извршната власт, заврши Ласовска.