Турција е подготвена да биде домаќин на разговорите меѓу Украина и Русија

Турција е подготвена да биде домаќин на разговорите меѓу Украина и Русија, изјави претседателот на земјата, Реџеп Таип Ердоган. Тој се сретна со неговиот украински колега Володимир Зеленски.

Двајцата шефови на држави разговараа за можностите Турција да посредува во размената на воени заробеници и да ја зајакне соработката во одбранбената сфера.

Прашањето за слободна пловидба во Црното Море беше дискутирано и откако Русија се повлече од договорот за жито минатото лето.

Володимир Зеленски посети и бродоградилиште во Истанбул, каде што се градат две фрегати за украинската морнарица.

„Денеска имавме искрени и продуктивни разговори меѓу Украина и Турција, како и секогаш. Очигледен приоритет е да ја зајакнеме нашата безбедност и сила што е можно повеќе со цел да се врати праведен мир за целата наша земја и за целиот наш народ што е можно поскоро“, рече Зеленски.

Истовремено, Брисел најави дека до крајот на месецот Киев ќе ги добие првите 4,5 милијарди евра од т.н. Механизам за Украина, кој предвидува вкупно 50 милијарди евра финансиска, техничка и воена помош.