Газа: Загинале над 15 илјади деца, повеќе од 20 илјади се водат за исчезнати
Министерството за здравство на Хамас, палестинската организација која владее со Газа, денеска соопшти дека во израелските напади во претходните 24 часа загинале 47 лица.
Од почетокот на војната пред повеќе од осум месеци, на таа палестинска територија загинале вкупно 37.765 лица, а 86.429 се ранети, пренесе агенцијата „Франс прес“.
Според написите на светските медиуми се проценува дека повеќе од 15.000 деца загинале во израелските напади врз Газа.
Невладината организација „Спасете ги децата“ во извештајот проценила дека за време на таа војна исчезнале 21.000 деца.
„Речиси е невозможно да се соберат и потврдат информации во сегашните околности во Газа“, се вели во извештајот, но врз основа на обемот на бомбардирањето и густината на населението, се проценува дека 5.160 деца се мртви под урнатините, пренесува „Бета“.
Останатите деца починале од рани поради кои биле непрепознатливи, биле закопани во необележани масовни гробници или исчезнале во хаосот на конфликтот, се наведува во денешното известување на британскиот весник „Гардијан“.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
