Мерки за заштита на автохтоната раса на свињи

Кривопаланечкото здружение Граѓански центар за одржлив развој „Егри“ започна со имплементација на проектот под наслов „Истражување за постоење на автохтона раса свињи – шишки во Република Македонија и предлагање на мерки за нивна заштита“.

Шишките се редок сој на свињи, полудиви и се одгледуваат на специфичен начин. Истите спаѓаат во загрозен вид на свињи и се на работ на исчезнување.

Проектот ќе резултира со документ од содржајни мерки за заштита на овој вид на животни, како и правење на резервати на Осоговските Планини, како идеално место за зачувување на овој вид на свињи и изградба на репродукциони центри не само за Македонија, туку и пошироко на Балканот.

Ментор на проектот е проф. Д-р Владин Вуковиќ, професор на Факултетот за земјоделски науки и храна при УКИМ од Скопје.

Вкупна вредност на истражувачкиот планирачки грант е 2.000 долари и истиот ќе се финансира од Глобалниот еколошки фонд и Програмата за мали грантови.