Скок на цените на нафтата

Цените на нафтата денеска се искачија на 76 долари на меѓународните пазари, бидејќи очекувањата за посилна кинеска побарувачка по најавата за нови монетарни стимулации се совпаднаа со стравувањата дека израелските напади врз Либан би можеле да предизвикаат општа војна на Блискиот Исток и да ги загрозат залихите.

На лондонскиот пазар цената на барелот по пладне беше повисока за 1,79 долари отколку на затворањето на тргувањето вчера и изнесуваше 75,69 долари. На американскиот пазар барелот се тргуваше по повисока цена од 1,87 долари, од 72,24 долари.

Почетокот на денешното тргување го означи кинеската централна банка која најави мерки кои треба да го заживеат пазарот на недвижности и финансиски да ги растовараат граѓаните, отворајќи го патот за посилна побарувачка. Тоа ќе значи посилен економски раст и побарувачка за енергетски производи. Централната банка сака да ги натера комерцијалните кредитори да ги намалат каматните стапки на одобрените хипотекарни заеми за купување станбен имот во просек за половина процентен поен, што ќе ги намали каматните трошоци за семејствата во просек за 150 милијарди јуани (21 милијарди долари) годишно. – рече гувернерот Пан Гонгшенг на прес-конференцијата.

Кинеската побарувачка во опаѓање и ситуацијата на Блискиот Исток
Трговците со недели стравуваат од знаци на забавување на кинеската побарувачка за енергија, а минатата недела беа загрижени од забавувањето на рафинериското производство во август, заедно со побавниот раст на индустриското производство и продажбата на мало. „Пазарот на сурова нафта очајно гледаше кон кинеските власти, надевајќи се дека тие ќе одговорат на забавувањето на економската активност со дополнително олабавување на монетарната политика“, објасни Тони Сајкамор од ИГ за денешната реакција на пазарот „Денешната одлука донекаде ќе ја ублажи негативната страна ризик за цените на суровата нафта“, додаде Сикамор.

За цената на нафтата да расте во подолг временски период, Кина мора да ги придружува монетарните мерки со експанзивна фискална политика, објасни Келвин Вонг од ОАНДА.

Трговците будно ја следат и ситуацијата на Блискиот Исток. Израелската војска во понеделникот објави дека започнала воздушни напади врз голем број цели во Либан, тврдејќи дека тие биле насочени кон Хезболах. Либанските здравствени власти известија дека во израелските напади биле убиени 492 лица и дека десетици илјади луѓе избегале. „Израелскиот воен командант рече дека планираат да ги засилат нападите врз Хезболах, поттикнувајќи ги стравувањата од можна сеопфатна војна на Блискиот Исток што може целосно да го дестабилизира регионот“, рече Алекс Ходес од StoneX.

Американските производители на нафта ги евакуираат работниците од платформите во Мексиканскиот залив, бидејќи метеоролошката служба најави нов ураган во следните две недели. Неколку нафтени компании прекинаа дел од своето производство.

Организацијата на земјите извознички на нафта (ОПЕК) одделно објави дека барел од нафтената кошничка на нејзините членки во понеделникот паднал за 30 центи на 74,44 долари.