Утре ден на жалост во Охрид по повод смртта на митрополитот Тимотеј

Советот на Општина Охрид денеска со акламација ја усвои предлог-одлуката за прогласување на утрешниот ден за Ден на жалост, по повод ненадејната смрт на митрополитот Дебарско-кичевски, господин Тимотеј.

Согласно одлуката на градските советници, во текот на утрешниот ден знамињата ќе бидат на половина копје, а се откажуваат сите културно забавни збиднувања на територијата на Општина Охрид.

Синодот на Македонската православна црква определи дека заупокоената Света литургија и опелото по повод упокојувањето на владиката Тимотеј да бидат извршени во утре во катедралната црква „Света Софија“ со почеток во 9 часот. 

На Светата литургија ќе чиноначалствува Неговото блаженство Архиепископ Охридски и Македонски г.г. Стефан во сослужение со надлежните епархиски архијереи на МПЦ – ОА, како и со претставници од другите Помесни православни цркви.

Посмртните останки на владиката Тимотеј ќе бидат погребани утре, до јужната апсада на храмот на Свети Пантелејмон на Плаошник.