Средба Сиљановска-Јандроковиќ: Заканата со вето од соседите не е фер

Претседателката Гордана Сиљановска-Давкова го прими претседателот на Саборот на Република Хрватска, Гордан Јандроковиќ, кој е во официјална посета на земјава.

Обајцата, како што соопшти претседателскиот Кабинет, се потсетиле на заедничките почетоци на евроинтеграцијата пред дваесет години, но со целосно различен исход.

За претседателката, хрватското евроинтеграциско искуство е релевантна лекција за нас и Хрватска, како наш докажан пријател може многу да ни помогне со научените лекции во процесот на евроинтеграцијата.  

Сиљановска-Давкова ја истакнала нашата готовност да се фатиме во костец со Копенхагенските предизвици, доколку не бидеме заглавени во бесмислените билатерални спорови, што се реална закана не само за нас и регионот, туку и за проширувањето на ЕУ.

Претседателот на Саборот на Хрватска изразил став дека заканата со вето од соседите не е фер и дека Хрватска ќе остане наш верен пријател со големо разбирање и поддршка за нас.

Претседателката и претседателот на Хрватскиот Сабор ја потенцирале грижата за македонското малцинство во Хрватска и хрватското во Македонија, коишто прераснале во цврсти мостови на заемна доверба и соработка.

На средбата станало збор за драматичните промени во светскиот поредок, како и за ранливата безбедносна состојба во европски и светски рамки со заложба за трајно руско-украинско мировно решение.

Средбата, како што е наведено во соопштението, завршила со согласност да продолжат, да се прошират и продлабочат македонско-хрватските односи во сферата на политиката, економијата, културата, туризмот и спортот.

Претседателката испратила топли поздрави до претседателот на Хрватска кого го очекува во државна посета во мај.