Палчо отстранет од судница - Кешишев се плашел да сведочи пред него

Игор Ефтимов, адвокатот на Влатко Кешишев, побара првообвинетиот Љупчо Палевски – Палчо да не присуствува на денешното рочиште, за тој да може да сведочи за убиствата на малолетната Вања и велешанецот Панче, во Основниот кривичен суд Скопје. 

Адвокатот Ефтимов го побара ова поради тоа што како што кажа „пред него Кешишев немало да ја зборува вистината“. Игор Ефремов, потсети дека Палчо веќе еднаш се обидел да изманипулира со Кешишев, давајќи му изјава за да ја препише, а потоа, да ја претстави како негова, во која стоеше дека Палчо не бил на местата каде се случија убиствата. И покрај бунењето од страна на адвокатот на Палчо, Јовица Страшевски, тој беше отстранет.

- „Јас се противам на ваквиот предлог од причина што нема потреба од вакви драми и сцени. Истиот може да ја зборува вистината ако ја знае и искрено да си ја каже. А, на Љупчо Палевски мислам дека со тоа би му било оневозможено да го следи исказот и потоа да поставува прашања. Едно јас како бранител да го следам исказот, а друго е кога обвинетиот би го следел и би поставувал прашања кон обвинетите“, рече Страшевски.

И Палчо се бунеше на ова барање.

- „Изнесува факти кои не постојат. Заборави да приложи писмо или пишана изјава од мене со која сум го терал Кешишев да ја потпише. Ова е вторпат пред судот да изнесува лаги, без притоа да приложи било каков доказ дека јас сум давал искази/писма кои требало да се препишат во име на обвинетиот. И затоа го молам судот да бидам присутен, бидејќи на претходните испрашувања не добив ниту еден укор дека сум прекинувал или влијаел на процеси на давање на исказ на обвинетите. Може и со грб кон мене да биде свртен, мене не ми е важно да слушнам што ќе каже“, рече Палчо.

На 25.11 Палчо му дал на Кешишев изјава да ја препише и да ја достави до судот додека во комбе се превезувале од затвор кон суд.

- „Јас ќе го напуштам судењето. Ниту е утврден стравот од доктор или вешто лице, но судот да носи вакви одлуки е срамно. Срамот е само на збор кажан, без докази. Ова е само една приказна, која за жал, судот ја прифати. Невозможно е вакво решение да се носи само со зборови од една страна. Во ваква атмосфера јас како бранител на Палевски не можам да учествувам во ваква хајка и драма која непотребно се прави. Барам да повикаме вешто лице да изврши испитување и да видиме дали има страв да говори пред Палевски, а нема страв и понатаму да одговара во постапката на прашања од Палевски“, рече Страшевски.

Претходно, беше сослушан обвинетиот Велибор Манев кој во детали ги образложи грабнувањета на Вања и Панче, при што посочи дека координатор и извршител на убиствата бил обвинетиот Љупчо Палевски. Тој нагласи дека после убиството на Панче, продолжил со грабнувањето на Вања поради страв и закани од Палевски кон него и неговото семејство.

Манев потенцираше дека сметале оти треба да грабнат жена на 38-40 години и дека се обиделе да го предомислат Палевски откако виделе дека грабнале дете. Воедно, кажа дека за грабнувањата им биле ветени по 150 илјади евра.Тој тврдеше дека таткото на Вања, Александар Ѓорчевски, не е вмешан во случајот. 

И Манев, како и Видевски, посочија дека биле изложени на тортура при нивните распити во полицијата.

Според најавеното, по сослушувањето на Кешишев, треба да сведочат таткото на Вања, Александар Ѓорчевски и Љупчо Палевски.

Во обвинението стои дека Љупчо Палевски, Боре Видевски, Велибор Манев, Влатко Кешишов и Александар Ѓорчевски, заедно испланирале грабнување на 14-годишната Вања со цел да присилат член на нејзиното потесно семејство да даде парични средства за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „Цитроен“ за да го користат за грабнување на детето во Скопје.

Малолетната Вања и велешанецот Панче, беа пријавени за исчезнати на 27 и 24 ноември, а на 3 декември 2023 година беа пронајдени мртви во близина на Скопје и Велес.