Се огласи и Трамп по падот на патничкиот авион: „Не е добро“

Американскиот претседател Доналд Трамп е информиран дека патнички авион се урнал во Вашингтон, откако авионот се судрил со воен хеликоптер.

Двете летала се урнаа во заледената река Потомак во близина на националниот аеродром Роналд Реган, а спасувачите неуморно трагаат по преживеани. За жал, досега од водата се извлечени 18 безживотни тела. Се намалуваат надежите за пронаоѓање на преживеани.

Набргу по трагедијата, кабинетот на Трамп излезе со соопштение во кое се наведува дека претседателот бил информиран за несреќата. Трамп очигледно од минута во минута ги следи случувањата на теренот, а на социјалната мрежа „Truth Social“ ги искажа своите размислувања за трагедијата.

Во објавата, Трамп рече дека несреќата „требаше да се спречи“ и изрази загриженост за инцидентот.

„Авионот беше на совршена и рутинска линија за приближување до аеродромот. Хеликоптерот се движеше право кон авионот подолг временски период. Беше јасна ноќ! Светлата на авионот пламтеа, зошто хеликоптерот не отишол нагоре или надолу, ни се свртел. Зошто контролната кула не му кажала на хеликоптерот што да прави наместо да праша дали го виделе авионот. Ова е лоша ситуација која требаше да се спречи! Не е добро!“, напиша Трамп.