Тамара Тодевска на 8 мај организира хуманитарен концерт за Кочани

На 8 мај, со почеток во 20:00 часот, во Младинскиот културен центар – Скопје, ќе се одржи хуманитарен концерт на познатата македонска пејачка Тамара Тодевска. Настанот е посветен на жртвите од трагичниот пожар во Кочани.

„Заедно со мојот бенд и со целокупниот тим се подготвуваме за претстојниот хуманитарен концерт за поддршка на семејствата на починатите граѓани во Кочани, како и на оние лице кои сѐ уште се лекуваат во Македонија и во европските земји.

Сакам да Ве известам сите дека концертот ќе се одржи на 8. мај (четврток), од причина што правиме целосно нови аранжмани на песните, кои ќе добијат една нова вредност и уникатност. Локацијата останува иста – Младински културен центар, од 20:00 часот. Картите од денеска се во продажба и ќе можете да ги набавите преку мрежата на MK Tickets: https://shorturl.at/OtZ60

 Хуманитарниот концерт за Кочани ќе биде едно поинакво доживување од сите претходни мои концерти, настапи на кои сте присуствувале. Сакаме да создадеме една поинаква, интимна вечер која на достоинствен начин ќе оддаде почит на сите жртви од трагедијата во Кочани, но и ќе се потсетиме на врвните наши уметници, мои колеги и пријатели кои прерано си заминаа од овој свет…

Ја истакнувам мојата благодарност до МКЦ, DVD 5, како и до мојот бенд и до целиот тим кои навистина посветено работат за да имаме квалитетен музички настан.

Ви благодарам на разбирањето и поддршката“, објави пејачката.