Видео: Пајакот не сакаше да дигне Порше на полицаец во Скопје

На социјалната мрежа Фејсбук се појави видео на кое се гледа како пајак службата не сака да крене возило кое е непрописно паркирано, бидејќи е на полицаец.

- Е ова е корупција. Вака работи коруптивен систем. За ова ги плаќаме со даноци. Секоја корупција убива, стои во описот на споделеното видео кое доби голем број на коментари.

На видеото може да се слушне и види како пајак службата не сака да подигне возило кое е паркирано на тротоар, непрописно, бидејќи било на полицаец.

- Дур се случуваат смртни случаи не сакаат да земат непрописно паркирана кола, зошто си одите?, ги прашуваат луѓето кои го снимаат видеото.

Од пајак службата велат дека е службено возило па затоа не го креваат, а насобраните луѓе велат дека стои 4, 5 часа непрописно паркирано и бараат да се пише казна.

- Казна, казна...какво е тоа службено Порше?, извикуваат насобраните лица.

Видеото доби и голем број коментари на Фејсбук: 

- Македонија и се е можно, гласи еден коментар.

- Треба сите вака да се обединиме, гласи друг.

- Колава дека само од плата штедел, стои во друг коментар на видеото.

На крајот вработените во Пајак службата излегоа од возилото за да го кренат Поршето по бурните реакции на насобраната толпа.