Воведуваат забрана за социјалните мрежи за деца под 16 години

Австралискиот премиер Ентони Албанес изјави дека неговата влада ќе донесе законска забрана за социјалните мрежи за деца под 16 години, што е прв таков предлог во светот. „Социјалните мрежи им штетат на нашите деца и сакам да се стави крај на тоа“, рече Албанес на прес-конференција.

Законот годинава ќе биде испратен до Собранието, а ќе стапи на сила дванаесет месеци откако пратениците ќе го прифатат, додаде тој.

Корисниците со родителска согласност нема да бидат исклучок.

„Социјалните мрежи ќе имаат обврска да го спречат пристапот. Тој товар нема да биде ниту на децата, ниту на родителите“, рече премиерот.

Министерката за комуникации Мишел Роуланд појасни дека законот ќе важи за платформите на Мета Инстаграм и Фејсбук, како и за Тикток и Икс на Илон Маск, а веројатно и за Јутјуб.