Италијанец добивал плата 15 години, а ниту еднаш не дошол на работа

Еден човек, вработен во локална здравствена установа во калабрискиот град Катанзаро, добивал плата 15 години, а притоа никогаш не се појавил на работа. Тој бил вработен во одделот за итни интервенции во случај на пожар, а за тоа време заработил повеќе од половина милион евра.

Полицијата ги прегледала картичките за присуство на работа и открила дека 66-годишниот Салваторе С. никогаш не дошол на работа за која земал редовна плата, а за да обезбеди такво нешто, Салваторе повеќепати испраќал „трето“ лице кое им се заканувало на газдите, колегите и членовите на нивните семејства, ако не му дозволат на Салваторе да не работи а да прима плата, пренесува Анса.

Обвинителството ги истражува деталите за случајот, а покрај „серискиот неработник“, како што го дефинира локалниот печат, обвинети се уште 6 вработени во здравствената установа, меѓу кои и двајца шефови.

Макфакс