Манасиевски: Шукова е директно виновна за случајот со Вардариште

Ајродром, ајро, ајро викаше Заев на цел глас во 2017 година и ветуваше чист воздух во Аеродром, додека Каја Шукова му беше задолжена за воздухот. СДС, Заев и Шукова уште пред 7 години ветуваа почист воздух и почиста животна средина во Аеродром, рече на денешната прес-конференцијата на Валентин Манасиевски, член на ЦК на ВМРО-ДПМНЕ.

Поранешната министерка за животна средина и поранешна државна секретарка во истоименото министерство, Каја Шукова која сега е кандидат за градоначалник од редовите на СДС за Град Скопје, сега повторно ветува средување на Вардариште и почист воздух за граѓаните, истакна Манасиевски.

„Прашуваме со кое лице, Шукова излегува повторно пред граѓаните и говори за Вардариште, кога таа изминативе 7 години, беше државен секретар и министерка во Министерството за животна средина, а притоа таму работи над 20 години. Со ова, Шукова е директно виновна за случајот со Вардариште.

Кога Шукова не успеа за над 20 години работа во ресорното министерство, дополнително како државен секретар и министер да го реши Вардариште, со кое лице повторно излегува пред граѓаните и ветува дека дури сега за 3 месеци ќе го среди овој проблем?“, прашува Манасиевски.

Манасиевски потсети дека во време на СДС, локалната и централната власт ги тргнаа чуварските служби од Вардариште и од Дрисла.

„СДС со Филипче, Заев и Шукова беа 7 години власт. Што тие направија за 7 години власт во делот на животната средина? Ништо.

Затоа граѓаните заслужуваат подобра животна средина и почист воздух, која ВМРО-ДПМНЕ и Орце Ѓорѓиевски заедно ќе ја исполнат“, нагласи Манасиевски.