„Од сон до сонце“ - еве како ќе биде одбележан најголемиот македонски празник Илинден

„Од сон до сонце“ е мотото под кое оваа година ќе биде одбележан најголемиот македонски празник - 2 Август. За ова денеска на прес-конференција информираше владиниот потпарол, Александар Ѓорѓиев.

Предвидени се низа активности од спортски, културен, едукативен и државнички карактер: - Она што го изградиле нашите предци е најцврст темел на којшто ја градиме нашата иднина. Сонот за којшто тие се бореле е слободата која што денес ние ја живееме. Да продолжиме да се движиме напред кон сигурна иднина затоа што секоја наша нова победа денес е нов Илинден за следните генерации. Тоа е пораката која што сака Република Македонија да ја испрати оваа година во врска со одбележувањето на 2 Август и на тој начин симболички да се поврза минатото, сегашноста и иднината како најдобар ориентир овие вредности коишто биле промовирани во минатото да се искористат во актуелната ситуација, со цел да се обезбеди подобра иднина за сите граѓани на Македонија и подобар развој на нашата земја, рече Ѓорѓиев на прес-конференцијата.

Во одбележување на програмата ќе бидат вклучени Сојузот на борците од НОБ, Македонската академија на науките и уметностите, националниот сервис МРТ, а со свои активности ќе се вклучат и сите општини во Републиката, а на свеченоста ќе се обрати претседателот на државата Ѓорге Иванов, на собирот во Крушево ќе се обрати претседателот на Собранието Трајко Вељаноски, а во Пелинце премиерот Никола Груевски.

И оваа година ќе биде организиран бесплатен превоз за сите граѓани кои ќе сакаат да присуствуваат на прославите по повод 2 Август во Крушево и во Пелинце. 

26.07.2014 - 12:36
 
 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега