Голем интерес за упис на Штипскиот универзитет

Во првиот ден од првиот уписен рок на Универзитетот „Гоце Делчев“ (УГД) во Штип во академската 2014/2015 се пријавиле околу илјада идни студенти.

Проректорот за настава, Емилија Јаневиќ-Ивановска, изјави дека уписите во прва година на Штипскиот универзитет течат без никакви проблеми, а досега кандидатите најмногу се интересираат за студиските програми на Медицинскиот факултет.

- Интересот генерално е како и секоја година. Очекувам оваа година техничките факултети да бидат повеќе експонирани. Има  заинтересираност и за трите академии - за филм, ликовна и за музичка уметност, рече Јаневиќ-Ивановска.

На 12-те факултети и на трите академии на Универзитетот „Гоце Делчев“-Штип има вкупно 4.728 слободни места, од кои 2.839 за редовни студенти во државната квота, 1.049 во квотата за кофинансирање на студиите и 840 места за вонредни студенти.

Првиот уписен рок на УГД почна денеска и ќе трае утре и задутре. Конечните резултати за прием на кандидатите ќе бидат објавени на 22 август, а запишувањето во првиот уписен рок ќе биде на 25-ти и 26 август.