Цените на недвижностите ќе паѓаат, а банките ќе го одврзат ќесето

Недоволната куповна моќ, ниската свест за алтернативните начини на инвестирање и ригидната банкарска политика – ова се трите ограничувачки фактори, кои го кочат развојот на македонскиот пазар на недвижности. Моменталната слика е прилично јасна и може едноставно да се исцрта – преголема понуда и слаба ликвидност, што во првата половина од годинава резултираше со помал број на трансакции за 17 проценти, споредено со лани, пишува Лидер.

Се изградиле 3.077 станови, од кои, во моментот на завршување, биле продадени само 47%. Но, поголеми придвижувања на пазарот се очекуваат во втората половина од годинава. Цените на недвижностите ќе паѓаат, а банките повеќе ќе го одврзат ќесето.

-Во последните две години има континуиран пад на цената на становите. Ова, пред сè се должи на зголемената понуда. Падот на цените доведе до несигурност кај купувачите, кои чекаа цените да продолжат да паѓаат, што придонесе за намалена ликвидност на пазарот. Политиката на домашните банки претставува еден од најголемите ограничувачки фактори. На пример, ако ги погледнеме земјите од регионот, ќе видиме дека критериумите на банките се многу пофлексибилни, и во однос на каматните стапки, и во однос на условите кои граѓаните треба да ги задоволат за да дојдат до кредит. Ова е сериозен проблем кој влијае на ликвидноста на пазарот и на бројот на трансакции. Сметаме дека, доколку банките се пофлексибилни, може да се очекува да се раздвижи целиот пазар на станови, вели генералниот менаџер на Фортон Македонија, Влатко Богоевски.

Најголемо намалување на цената на становите се очекува во скопски Аеродром, бидејќи во оваа општина се лоцирани и најголемиот број проекти во изградба, а учествува со големи 51% удел во вкупната понуда.

Надолен тренд на цените се очекува да ги зафати и Карпош и Чаир. Големата понуда врши притисок врз цените, кои се најважниот фактор при купување стан. А, понудата од ден на ден сè повеќе се зголемува. Во првите пет месеци од годинава се издадени 1.340 одобренија за изградба на станови во Скопје, за 14,5% повеќе, споредно со истиот период лани. Дополнително, 2.481 стан се во фаза на градба, што само ја потврдува проценката дека ни претстои период во кој цените значително ќе паѓаат. Лани, просечната продажна цена се намалила за 6%, во првите шест месеци од годинава се стопила за дополнителни 2,4%, а за две години, падот изнесува цели 19 проценти.

Се уште најскапи се становите во Центар, во просек, 1.200 евра за квадратен метар. 1.090 евра е квадрат во Карпош, 930 во Аеродром, 890 во Кисела Вода.

-Карактеристиките кои го дефинираат однесувањето на купувачите се подредени по следниот редослед: цена (50%), локација (30%) и квалитет (20%). Затоа, инвеститорите ако сакаат да имаат успешен проект, би требало да се движат во овие рамки и да ги пресретнат потребите на купувачите“ – порачуваат од Фортон Македонија.

Инвеститорите, пак, уште од почетокот на годинава порачуваат дека ова се реални цени под кои не може да оди, пред сè како резултат на зголемените влезни трошоци.
„Многу од влезните трошоци, како бетон, цемент и железо поскапеа, а цените се задржаа. Има благ тренд на опаѓање на цената, но под оваа цена не е исплатливо да се оди“ – изјави Ванчо Чифлиганец од Адора Инженеринг, на Саемот за градежништво.

Ќе растат цените за деловен простор!

За разлика од пазарот на станови, кај деловниот простор има обратна тенденција. Цените ќе растат, како резултат на зголемената економска активност. Имено, побарувачката на канцелариски простор од „А“ класа е поголема од понудата, а големите корпорации се лоцирани во објекти кои, според анализата на Фортон, не ги задоволуваат нивните моментални потреби.

Ова ќе ја поттикне побарувачката на деловен простор, особено од страна на компаниите од ИКТ – секторот, но и од фирмите што нудат финансиски услуги, кои би биле заинтересирани за специјализирани објекти.

Фортон: Ценовен притисок врз ГТЦ!

Во делот на шопинг центрите, се очекува ценовна стабилизација (се смета дека е постигнат еквилибриум на понудата и побарувачката), иако има голема експанзија кај супермаркетите. Сумирано, 10 проценти од дуќаните во трговските центри се празни. Хипер Веро и Капитол Мол успеале да пополнат повеќе простор, на сметка на ГТЦ и Рамстор каде се зголемил бројот на слободни дуќани.

Токму најстариот трговски центар во Скопје се очекува да биде под најголем ценовен притисок, за да остане во трка со конкуренцијата. Во моментов, за да се закупи дуќан на атрактивна локација во трговските центри, зависно од договорените услови, цената се движи и до 40 евра од квадратен метар.

-Во ГТЦ се очекува најголем пад на цените, бидејќи се работи за стар модел на трговски центар, а шопинг културата на граѓаните се менува. Сега сакаат да пазарат во организациони средини, каде има соодветна климатизација. ГТЦ тие услови не ги нуди, ниту во поглед на содржините, ниту во однос на функционалноста или квалитетот. Цените во ГТЦ паѓаат веќе две години, но ние очекуваме и во претстојниот период драстично намалување, вели Богоевски од Фортон Македонија.