Извозот на Бугарија во 2013 година пораснал за 7,2 проценти
Во текот на 2013 година Бугарија извезла стоки во вредност од 43,6 милијарди лева (22.2 милијардi евра), што претставува раст од 7,2 проценти во однос на претходната година, соопшти денеска бугарскиот Национален статистички завод.
Како што јави БТА, споредено по месеци најголем раст е забележан во јануари минатата година од 23,9 отсто, а значително зголемување од 9,3 процент на извозот имало и во мај.
Во исто време, лани Бугарија увезла стоки во вредност од 50,5 милијарди лева (25,8 милијарди евра), што претставува раст од 1,4 проценти во споредба со 2012 година. По месеци најголем раст на увозот е забележан во септември (13,3 отсто) и во мај (11,2 проценти).
На овој начин вкупната трговска размена на Бугарија лани достигна дефицит од седум милијарди лева (околу 3,58 милијарди евра), што е за 2,2 милијарди лева (1,1 милијарди евра) помалку во однос на 2012 година.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
