Во четири одвоени случаи поднесени кривични и прекршочни пријави за девет лица

Во рамки на оперативната акцијата „Гора“ насочена кон спречување на бесправна сеча на шума и бесправна продажба на огревно дрво, изминативе неколку дена на подрачјето на СВР Скопје и СВР Велес во четири одвоени случаи кривично и прекршочно се поднесени пријави против девет лица.

Првпат во досегашната судска пракса, нагласи на денешната прес-конференција министерката за внатрешни работи Гордана Јанкулоска, за вакво дело во Судот во Скопје на едно од лицата му е изречена и мерка притвор.

- Штетата може да се пресметува на различни начини. Ако ја пресметуваме во однос на продажната цена на еден метар кубен огревно дрво, тоа е некаде над 36 илјади евра во последните случаи. Меѓутоа, ако штетата ја пресметаме од аспект на непланско и неконтролирано сечење на шумите и сечење на стебла на места каде што тоа не е дозволено од различни причини дали тие се поврзани со животната средина или со економски планирања, тогаш штетата е многукратно поголема бидејќи стеблата кои најчесто се цел на дивите сечачи на шуми, се повеќегодишни стебла и за нивно обновување е потребно долго време, рече Јанкулоска.

Во првиот случај до Јавното обвинителство Скопје поднесена е кривична пријава против Ј.Ќ.(37) за сторени кривични дела „кражба“ и „фалсификување исправа“, како и против Н.О.(53) и Б.О.(23) за сторено кривично дело „помагање“. Од страна на Судија во претходна постапка, потенцира Јанкулоска, на  Ј.Ќ. му беше изречена мерка притвор во траење од осум дена додека на другите две лица им е изречена мерка на претпазливост - забрана за напуштање на живеалиште односно престојувалиште, привремено им се одземени и патните исправи и истите имаат обврска повремено да се јавуваат на надлежен државен орган.

Пријавените се товарат бидејќи со цел да извршат бесправна сеча на букови огревни дрва и да ја легализираат, до правното лице „Форест Инжинеринг" ДООЕЛ Скопје, поднеле барање за сеча на огревни дрва при што ги приложиле потребните документи меѓу кои и фалсификувано полномошно со цел да прикажат легална сеча на дрва од приватна парцела, која е сопственост на членови на семејство на Ј.Ќ. за што наводно од страна на лиценцирано лице им било издадено одобрение за сеча. За таа цел, појасни министерката Јанкулоска, пријавените уплатиле и 10.500 денари во корист на "Форест Инженеринг". Неместо тоа, пријавените лица исекле 33 метри кубни буково огревно дрво од друга парцела, која е во државна сопственост.

Вториот случај е реализиран на патот помеѓу село Танушевци и село Арачиново на место викано „Вуксан“, при што кривична пријава е поднесена против Е.С.(27) од Скопје за сторени кривични дела „спречување на службено лице во вршење службено дејствие“ и „кражба“. Пријавениот иако не поседувал одобрение за сеча на дрва, при крајот на минатиот месец бесправно исекол повеќе стебла буково дрво без жиг, односно 3,5 метри кубни.

Во третиот случај на подрачјето на СВР Велес врз основа на посебен план во рамки на оперативна акција „Гора“ извршена е акциска контрола од страна на полициски службеници од Полициско одделение Чашка и Полициска станица Велес, како и службеници на шумската полиција.

На место викано „Црници” атар на село Степаници и место викано Мукос од Е.А. и Р.В. двајцата од Прилеп одземени се две моторни пили, едно патничко моторно возило марка „лада рива“ кое било натоварено со помало количество огревно дрво, една секира, еден токмак со сечиво и 6 м3 противправно исечени дабови и букови сурови огревни дрва. Во непосредна близина, информира Јанкулоска, затекнати се уште две лица од Прилеп, Д.Ј. и Ф.Ј. при што од истите одземени се една рачна пила и 5 м3 противправно исечени дабови и букови огревни дрва.

Во последниот случај на подрачјето на м.в. Гробишта атар на село Бањица, велешко затекнат е Ф.Б. од село Г.Јаболчиште, а со привремен престој во Бањица како бесправно сече сурово габерово дрво.

Од почетокот на оперативната акција “Гора“, насочена кон сузбивање на криминалот поврзан со нелегална сеча на дрва, пустошење шуми и нелегална трговија со дрвна маса, потсети министерката Јанкулоска, од крајот на јуни годинава досега запленети се над 1.000 кубни метри огровно дрво, извршени се контроли во 245 легални складови за огревно дрво ширум земјата при што 49 складови се затворени. 

- Извршена е контрола на 31 правно лице лиценцирани за издавање одобренија за сеча на приватна шума, при што кај 21 субјект биле утврдени неправилности во работењето, а вредноста на досега запленетите огревни дрва е проценета на над 36.000 евра. Во рамки на акцијата досега поднесени се 14 кривични и над 170 прершочни пријави, рече министерклата за внатрешни работи Гордана Јанкулоска.