Во јули рекорден број на патници на македонските аеродроми

Продолжува растот на патници на двата домашни аеродроми. Во месец јули е забележан рекорден број на превезени патници, односно раст од 28 отсто на годишно ниво, информираат од „ТАВ Македонија“.

Во јули 2015 година бројот на патници е зголемен за 28% на годишно ниво, во споредба со јули 2014, или ако лани во јули македонските аеродроми имале 144.784 патници, оваа година во јули бројот на патници изнесува 185.811.

-Во периодот Јануари-Јули 2015 година, бројот на патници е зголемен за 17%, од 704.563 патници во првите седум месеци од 2014 година, на 823.492 патника во првите седум месеци од оваа 2015 година, велат од „ТАВ Македонија“.

Статистиката покажува дека откако компанијата го презеде активното управување со аеродромите, бројот на патници е значително зголемен, воведени се нови линии, квалитетот на услугата е на светско ниво.

Доколку се направи споредба со бројот на патници во периодот пред ТАВ да влезе во игра, се доаѓа до фрапантни податоци. Во првата половина на 2009-та година, вкупниот број на патници изнесувал 270.249, додека во првите шест месеци од 2015 година, бројот на превезени патници изнесува 637.681.

На годишно ниво, растот е над 75% за двата аеродрома. Турскиот холдинг го презеде управувањето со аеродромите во 2010-та година. Оттогаш, бројот на патници на скопскиот аеродром е зголемен за 76,7%, или во апсолутни бројки, од 684.905 патници во 2010-та на 1.210.509 патници во 2014-та година.

Во првите шест месеци од годинава е регистриран раст од 6,4 проценти во делот на воздухопловните операции. Од јануари до јуни имало вкупно 6.739 полетувања и слетувања на двата аеродрома. Најфрекфентна дестинација е Истанбул со учество од 15,6% во вкупниот сообраќај, а потоа следуваат Цирих, Виена, Базел, Малме и Лондон.

Од вкупниот број патници, 56,6% биле превезени со нискотарифните авиокомпании, што е јасен показател дека евтините билети и субвенционираните летови значително ги зголемија можностите за патување со авион од земјава. Во понудата од Скопје влегоа и Барселона, Осло, Нирнберг, Хамбург и Фридрихсхафен, плус Лондон и Базел од Охрид.

Скопскиот аеродром е во најдобрите 10 во источна Европа, покажува истражувањето на реномираната британска организација „Скајтрекс“. Биле анкетирани повеќе од 13 милиони луѓе, кои требало да се одлучат меѓу 550 аеродроми поделени во различни категории. Во предвид биле земени сите аспекти, од пристигнувањето, трансферите, шопинг искуството до прашањата поврзани со безбедноста.