Ставрески: Одличните економски резултати најавуваат успешна економска 2016 година

Натфрлувањето на економскиот раст за 2015 година, кој изнесува 3,7 отсто и е над владините проекции, како и растот на индустриското производство за 8 отсто на почетокот на 2016 година, дава основа да очекуваме дека 2016 година ќе биде успешна на економски план, вели вицепремиерот и министер за финансии Зоран Ставрески во интервју за Сител. - Резултатот за последното тримесечие од 2015 година од 3,9% раст на економијата е над нашите очекувања. Минатата година ја завршивме со 3,7% раст, што е над проекцијата на Владата и над општите очекувања. Врз база на тоа може да очекуваме дека 2016 година ќе биде успешна на економски план. Податокот за индустриско производство за јануари за раст на индустријата од 8 проценти го потврдува тоа. Очекувам тој добар тренд што го имаме да продолжи, а посебно да зајакне во втората половина од годината по завршувањето на изборите - истакна Ставрески. Вицепремиерот вели дека добрите економски резултати се показател дека економските политики се добро поставени и дека се креирани добри услови за домашните и странските фирми кои отвораат нови работни места. Ставрески вели дека имајчи ја во предвид сложената политичка ситуација во земјата ова се извонредни економски резултати. Државаната статистика објави дека македонската економија минатата година забележала раст од 3,7 отсто, што е за 0,2 процентни поени повеќе од проектираното. Деновви Статистика нотираше и историски најниска стапка на невработеноста во Македонија од 24,6 отсто.