Штојбер: Македонија успеа тоа што не им успеа на многу ЕУ членки

Во рамки на посетата на партиска делегација на ВМРО – ДПМНЕ на покраината Баварија денеска претседателот на партијата, Никола Груевски и членовите на партискиот Извршен комитет се сретнаа со поранешниот премиер на Баварија, Едмунд Штојбер.

На средбата со Штојбер, кој е поранешен претседател на ЦСУ, една од централните теми за разговор била бегалската криза во која што според домаќинот Македонија презела важна европска задача.

- Во последната година со затворањето на границата Македонија презеде врз себе една голема европска задача. Тоа беше нотирано од страна на многу други држави од Европа, меѓу кои Франција и Германија. Македонија успеа во она што многу други држави не успеаја, затоа сметам дека преговорите за влез треба продолжат понатаму и да се најде решение, рече Штојбер.

Екс лидерот на ЦСУ смета дека на предвремените парламентарни избори што ќе се одржат во Македонија ВМРО – ДПМНЕ ќе постигне голем успех.

- Се надевам дека изборите на 11 декември во Скопје нашата сестринска партија предводена од Груевски ќе оствари победа, додаде тој.

Од 2007 година Едмунд Штојбер е почесен претседател на ЦСУ која што функционира само во најбогатата германска покраина Баварија и која е сестринска партија на ЦДУ на канцеларката Ангела Меркел со која ја дели власта на ниво на Сојузна Република Германија.

Пред два месеци делегација на ВМРО – ДПМНЕ предводена од претседателот на партијата Никола Груевски оствари посета на Берлин каде што се сретна со триесетина претставници на германскиот политички и бизнис естаблишмент.