Амбасада на САД: Мирно да се протестира, да не се заплашуваат новинари

Слободното и мирно изразување мислење е витален дел од секоја демократија, како што се и независните медиуми, ослободени од заплашување, велат од Амбасадата на САД во Скопје по вчерашниот инцидент во кој нападнат а беше екипа на порталот А1 он. Од амбасадата го реафирмираат и ставот кој вчера го исперати Стејт Департментот во однос на процесот на формирање нова влада. „Како што вчера рече американската влада во соопштението од Вашингтон: САД ги повикуваат македонските лидери да формираат нова влада без понатамошно одложување, на начин во согласност со Уставот и со аспирациите на Македонија за влез во Европската Унија и во НАТО. Формирањето нова влада која е посветена на владеењето на правото и на имплементирањето на потребните реформи, ќе помогне за ставање крај на политичката криза која сериозно ги попречува демократскиот и економскиот развој и евроатланската интеграција на земјата. САД ги повикуваат сите страни да го стават интересот на Македонија и на нејзините граѓани пред сè друго, да работат конструктивно и за целосно спроведување на нивните обврски, преземени со Договорот од Пржино“, потсетуваат од Амбасадата на САД во Македонија.