Целосна забрана за движење во шуми важи само за Македонски Брод и Чашка
Министерството за земјоделство, шумарство и водостопанство соопшти дека на барање на ЈП Македонски шуми денеска дало согласност за повлекување на целосната и враќање на делумната забрана за движење во шуми. Но во регионите каде што е прогласена кризна состојба, односно за Македонски Брод и Чашка, останува во сила целосната забрана за движење во шуми.
Делумната забрана ќе трае се до проценка дека е намален ризикот од појава на шумски пожари. Делумната забрана за движење во шуми не важи за вработените во ЈП Македонски шуми и субјектите кои управуваат со заштитените подрачја, за организирана тура на туристи за туристичко рзгледување.
МЗШВ посочува дека и покрај враќањето на делумната забрана, и во следниот период ќе има засилени контроли на терен од страна на Шумската полиција и Инспекторатот за шумарство и ловство. Исто така, засилени конторли ќе се спроведат за да се спречи опожареното дрво да заврши во промет.
Министерот Љупчо Николовски истакнува дека се во постојана комуникација со ЈП Македонски шуми и дека нема да дозволат опожареното дрво да биде ставено во промет.
- Со новиот директор на ЈП Македонски шуми Зоран Ѓорѓиев, веќе ги креиравме политиките на кој начин ќе се спроведува постапката со опожареното дрво. Ќе се најде начин како ова опожарено дрво да се користи во понатамошниот период, но во никој случај нема да дозволиме тоа дрво да се препродава. Во координација со ЈП Македонски шуми, ќе ги разгледаме сите други опции како ова дрво може да се употреби за други намени, на пример за пензионери, синдикати или други цели, но нема да дозволиме ова опожарено дрво да се стави во промет, наведува во соопштение министерот за земјоделство, шумарство и водостопанство.
Ресорното министерство посочува дека во следниот период ќе продолжи да презема мерки и активности за зголемување на шумскиот фонд и за таа цел од следната година ќе биде за седумкратно зголемен буџетот за Програмата за проширена репродукција на шуми.
- Буџетот на Програмата за проширена репродукција на шуми, изминативе години десеткратно се намалил. Од 70 милиони денари во 2006 година, буџетот што претходната власт го предвидела за обнова на шумите за 2017 година, се сведува на 7 милиони денари. Во последните четери години вкупно се пошумени само 200 хектари. Буџетот за наредната година за оваа Програма го зголемуваме седумкратно и само идната година ќе се пошумат 300 хектари, односно повеќе од претходните пет години заедно. Првпат по пет години ќе се изврши авионско сузбивање на боров четник со што ќе се заштитат огромни борови површини, вели Николовски.
Во периодот што следува се очекуваат и резултатите од ревизијата што ја спроведува Државниот завод за ревизија во институциите надлежни за шумите, а која се спроведува по налог на министерот Николовски, уште пред активирањето на пожарите. Врз основа на резултатите од ревизијата ќе се спроведат соодветни мерки за превенција од пожари и зголемување на шумскиот фонд.
Според првичните податоци од Јавното претпријатие Македонски шуми, овој месец се регистрирани 56 пожари, а опожарени се 4.000 хектари. Досега е завршена постапката за 22 пожара, од коишто штетата е околу 1 милион евра.
- Првичните анализи покажуваат дека дел од пожарите се подметнати, а дел се предизвикани од невнимание. Министерството за внатрешни работи веќе има поднесено кривични пријави против две лица, посебен извешај за едно лице и записиници за две лица, поради постоење сомнение дека сториле кривично дело „предизвикување шумски пожари“ во регионот на Македонски Брод, наведува во соопштението Министерството за земјоделство, шумарство и водостопанство.
15.08.2017 - 19:05
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
