Попова: Дел од учениците немаат добиено учебници, СДС нема капацитет за водење на институциите
Измина речиси 1 месец откако започна новата учебна година, а голем дел од учениците се уште не ги добиле учебниците по сите предмети, кои вообичаено во изминатите 8 години, владата која ја предводеше ВМРО-ДПМНЕ ги обезбедуваше бесплатно и доставуваше навремено, пред први септември, обвинува Ирена Попова од ВМРО-ДПМНЕ.
-Родителите со право се загрижени. Наставниците, исто така. Тие се во непријатна ситуација затоа што, во следните неколку денови треба да започне проверката на знаењето на учениците, а тие пак, немаат од каде да учат. Иако, оваа активност треба да биде вообичаена за Министерството за образование и наука, неодговорната министерка од редовите на СДС, се уште не ја завршила и покрај ветувањата дека учебниците целосно ќе бидат набавени и дистрибуирани до 15-ти септември. Јавноста беше грубо излажана, а штетата е на сметка на учениците и наставниците. Повеќе од јасно е дека СДС нема капацитет за водење на институциите. Образованието е во тотален хаос. Освен укинувања, стопирања и блокирања на реформски процеси и проекти наменети за граѓаните, во изминатите 100 дена не видовме ништо корисно од политиката на оваа расипничка влада, истакна таа.
Оваа информацијата која денес ја споделивме, вели Попова, е само уште една причина и потврда дека СДС ќе биде казнет од мнозинството граѓани овие локални избори, по што ќе се отвори и можноста за предвремени парламентарни избори, со цел враќање на државата на вистинскиот пат.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа