СДСМ: ВМРО-ДПМНЕ не го осуди палењето на сликата на Заев и вчерашните протести

СДСМ реагира на како што велат отсуство на осуда од страна на ВМРО-ДПМНЕ на вчерашниот чин на палењето на сликата на партискиот лидер Зоран Заев.

„ВМРО-ДПМНЕ не само што не го осуди вчерашното палење фотографии на политички лидери, туку се најде и повикана да го брани преку соопштение, покажувајќи загриженост од осудите што целата демократска јавност ги изнесе против овој антидемократски чин.

Дали со тоа ВМРО-ДПМНЕ потврдува дека стојат позади ова антидемократско дејство?

Што мисли ВМРО-ДПМНЕ, дали палењето фотографии на демократски избрани лидери е чин за поздравување или чин за осуда?“ – стои во соопштението на СДСМ.

Од СДСМ реагираат и на тоа што ВМРО-ДПМНЕ не ги осудило вчерашните протести.

„ ВМРО-ДПМНЕ одбивајќи да ги осуди демонстрациите на омраза и одбивајќи да ги осуди повиците против интеграцијата на Република Македонија во НАТО и ЕУ, уште еднаш покажува дека не може да се оттргне од темното минато кое својата кулминација и завршница ја доживеа на крвавиот 27 април 2017 година“ – велат од СДСМ

СДСМ го достигна врвот на лицемерието и потценувањето на јавноста.  Пред неполни две години Зоран Заев и неговите соработници аплаудираа и славеа кога се палеа фотографии од Претседателот Ѓорге Иванов. Разулавените хулигани тогаш не застанаа само на палење фотографии, туку демолираа и палеа и државни институции, се вели во реакцијата на ВМРО-ДПМНЕ на соопштението на СДСМ дека палењето на фотографија на премиерот Зоран Заев на протестите во Австралија, било недемократски чин.

-Сега истите тие ги омаловажуваат и навредуваат Македонците ширум светот дека се примитивци и ги поистоветуваат со еден изолиран случај, само заради тоа што изразуваат несогласување со деструктивните политики на актуелната власт. Напротив, Македонците не се примитивци и имаат легитимно право да изразат револт и да се спротистават на тргувањето со највисоките национални интереси. Срамно, дури и за СДСМ, се вели во реакцијата во која беше објавено и видео на кое може да се види Заев како се смее на палењето на фотографијата на Претседателот Иванов