ВМРО-ДПМНЕ: Единствената цел на СДСМ е ова лепена коалиција да остане на власт

Единствената цел на СДСМ не е просперитетот на државата и заштитата на националните интереси, туку оваа лепена коалиција да остане на власт, соопштуваат од ВМРО-ДПМНЕ.

Од партијата додаваат дека потребите на граѓаните за СДСМ се на последно место, а на прво место е остварувањето на концесиите кон коалиционите партнери со цел задржување на своите фотелји.

-СДСМ не прашува ниту за цена, ниту за последици кога се работи за партиските интереси. Законот за двојазичност кој е резултат на класична уцена на корупмирани политичари е донесен спротивно на сите процедури. Тој ги надминува рамките на Уставот и Рамковниот договор, целосно е неприменлив и штетен. Ваквото законско решение ќе создаде дополнителни поделби во македонското општество по партиска и етничка основа, поделби кои ја загрозуваат унитарноста на државата, се наведува во партиското соопштение.

Од ВМРО-ДПМНЕ посочуваат дека овој закон ќе има и огромни економски импликации врз буџетот на државата како и директно влијание врз џебот на граѓаните поради огромните глоби кои се предвидени во Законот.

-Колку километри автопат, канализација, колку болници, градинки и игралишта можеа да се изградат со парите кои се наменети за реализација на овој политички хир на владеачкото мнознинство? СДСМ наместо за проекти и реалните потреби на народот сака да ги троши парите на граѓаните за зголемување на јавната администрација, удвојување на преводите и архивите на два јазика, менување на табли и изготвување на нови двојазични униформи и бaнкноти. Оние кои први ја препознаа единствената цел на СДСМ, доаѓањето на власт по цена и на жртвување на националните интереси, беа првите кои се најдоа во притвор. Патриотите меѓу кои се наоѓаат и уметници, интелектуалци, народни избраници не се терористи. Овие луѓе го крена гласот против вистинската закана за уставниот поредок на држава, а тоа е Зоран Заев и СДСМ. Секој час кој овие луѓе го поминуваат во притвор поради монтирани обвиненија е час повеќе кој не дели од правната држава и нашите стратешки цели ЕУ и НАТО. Правдата мора да се врати. Правдата и ќе се врати, а тогаш сите оние кои постапувале политички, а не по словото на Законот и Уставот ќе сносат одговорност, се наведува во соопштението од ВМРО-ДПМНЕ.