Ставревски: Изградбата на двата клучни автопати ќе ја подобри патната инфраструктура

Денеска вицепремиерот и министер за финансии, Зоран Ставревски, оцени дека со изградбата на двата клучни автопати, Скопје - Штип  и Кичево - Охрид значително ќе се подобри патната инфраструктура во Македонија, а со тоа и конкурентноста на економијата.

Според Ставрески, во завршна фаза е одобрувањето на кредитите за изградба на автопатите.

 - Од ЕКСИМ банката од Кина добивме потврда дека го поминале таму филтерот и оти исто така нивното Министерство  за трговија, кое што е надлежно, ги одобрило проектите. Сега стручните екипи на Министерството за финансии и од ЕКСИМ банката го доусогласуваат финалниот текст на договорот, што значи дека многу бргу,  во текот на овој месец, ќе бидат завршени и пуштени во владина процедура, по што следи собраниската процедура за донесување на законите за гаранција затоа што во случајот позајмувач ќе биде Јавното претпријатие за патишта, а Владата ќе ја издаде гаранцијата, рече Ставрески.

Аплицирањето на Владата за поволните кредити што ги одобрува кинеската Влада е направено врз основа на студии за тоа колку ќе чинат и за нивна изводливост.

 - Нашите пресметки се дека ќе чинат толку колку што сега одобри  кинеската Влада, односно ЕКСИМ банката. Предвидената вредност на проектите е целосно покриена, а доколку во текот на изградбата, како и  за секој крупен проект, се случи на терен  да има потреба од поголеми трошоци тогаш ќе разговараме за тоа како да се дополнат тие средства. Но, во оваа фаза проценката е направена врз основа на сериозни студии од стручни институции, појасни вицепремиерот Ставрески.