Сиљановска Давкова на средба со Ѓурчиновски: Армијата ќе продолжи да ја исполнува својата уставна должност

Претседателката Гордана Сиљановска Давкова денеска го прими началникот на генералштабот на Армијата, генерал-потполковник Васко Ѓурчиновски.

На средбата, прва по стапувањето на функцијата, претседателката Сиљановска Давкова беше информирана за тековните активности на Армијата во остварувањето на задачите за заштита на територијалниот интегритет и независноста, подготвеноста за исполнување на националните и на меѓународните обврски, придонесот во колективната самоодбрана, меѓународните операции и заштита на пошироките национални интереси.

Претседателката Сиљановска Давкова го изрази своето уверување дека македонската армија, како и досега, ќе продолжи со истата посветеност да ја исполнува својата уставна должност да го штити нашиот територијален интегритет и независност, а армиските припадници да продолжат да бидат пример за професионализам, дисциплина и посветеност, како што доликува на земја-членка на НАТО.

Претседателката Сиљановска Давкова ја истакна својата определба, како Врховен командант на вооружените сили, секогаш да дава поддршка за натамошно опремување и модернизација на Армијата и подобрување на условите за живот и работа на армиските припадници.